企鵝故事收集箱第二回！
✧｡٩ ( ˊ ᗜ ˋ ) و ✧ * ｡
上年10月尾，鵝喺無印良品MUJI 皇室堡店，擺咗為期約一個月嘅「眈天望地觀察動植物」展覽，同人類講吓動植物故事，同時都收集咗好多屬於人類嘅銅鑼灣故事。
大家估下鵝收到幾多故事？登登登！係超過50張寫滿故事嘅信紙呀！睇完啲信，鵝就好似同人類坐完時光機，暢遊佢哋嘅大小回憶庫～
٩(^ᴗ^)۶
有唔少人類都話銅鑼灣係佢哋嘅成長嘅地方，好似逛日式百貨公司，大丸、三越同松阪屋，行街shopping。
或者細個喺銅鑼灣讀中、小學，就算讀緊大學，都會返嚟探住喺到嘅婆婆，甚至因為對銅鑼灣嘅喜愛，長大搬過嚟居住，「夢想在工餘時間可以常逛維園」。
(。・ω・。)
鵝聽到都覺得好感動，每一個故事都盛載住人類對銅鑼灣嘅回憶；鵝希望新一年散步嘅時候，都可以好似人類咁，累積唔同嘅回憶啦～
Comments