鵝又去咗 #香港大球場 ！
話說早排搜集資料時發現，逢星期三、四，早上 10 點 及 下晝 3 點，都有導賞團參觀大球場，每位20蚊，約45分鐘，可以打電話預約，亦可即場參加。
於是鵝說孖鵝友去行吓，當日得鵝哋兩個，變咗private tour。導賞員帶鵝哋周圍睇，去咗草地球場外圍、高層座位、廂房層，仲去埋平時入場睇波去唔到嘅球員更衣室 & 頒獎台，行程意想不到咁豐富。
球員更衣室裝潢樸實但夠大，仲有按摩床方便球員做物理治療。
坐喺空寥寥嘅球場，時間好似靜止咗。球場拱頂襯托旁邊草木茂盛嘅山腰，好靚～
導賞員非常有耐心，等鵝影夠相，仲搞笑提議鵝哋行上高層座位最高點感受離心力添，不過可能鵝太矮，感受唔到⋯⋯
又，有關大球場改建，鵝問咗康文署，署方話改建計劃現時仍屬「研究階段」，未有確實改建日期嘅相關資料，「待有具體的規劃時，會適時向外公佈。」Any肥，到時大球場應該好幾年都會封咗，改建前推薦大家嚟影相留念啊～
Comments