銅鑼灣奧運橋 有翻新冇更新？

十一月初，#奧運橋 因為翻新工程，所以樓梯上嘅奧運舉行年份同主辦城市唔見晒！鵝早兩日去咗探橋，見到啲梯級已經髹返文字上去，不過最高嗰級⋯⋯

仲係寫住2016里約熱內盧奧運喎～～

唔見最近兩屆嘅2020東京奧運同2024巴黎奧運嘅？

香港運動員呢兩屆奧運成績斐然，#張家朗 成功衞冕連續兩屆奪金，#江旻憓 又贏到金牌，#何詩蓓 兩屆加埋有四面獎牌咁多，仲有好多好多運動員都創下佳績。奧運橋上面暫時唔見呢兩屆嘅資料，鵝覺得有啲可惜⋯⋯

(｡•́ - •̀｡)

咁翻新咗啲咩呢？

鵝揾返奧運嗰排去影嗰輯相，用金睛火眼去對比，發覺而家全條橋髹咗新油，色彩鮮豔，不過內容就冇更新喇。

( • ̀ ө •́ )✧

奧運橋披上五彩繽紛嘅顏色已經有22年。前兩次翻新分別喺2008年同2018年完成，兩次都有再髹油，加埋其他改動。2008年嗰次，將橋身嘅「北京申辦2008年奧運標誌」膠片換成「北京2008年奧運會會徽」同「馬術體育圖標」膠片。

而約十年後嗰次，就將兩屆取消咗嘅奧運寫埋喺同一級，並且調動原有空位，髹埋2012同2016年奧運嘅資料。

之前嘅翻新會改埋字，難怪今次啲街坊都估奧運橋會有新面貌，點知只係髹油～

究竟2020東京奧運、2024巴黎奧運、2028洛杉磯奧運將會髹喺橋嘅邊個位呢，唔通係橋面？鵝拭目以待！

˗ˋˏ(•ө•)ˎˊ˗

#企鵝散步見聞