\ (• ө • ❀) /
夠鐘開估——
其實佢哋都係指波斯富街以東、邊寧頓街以西、軒尼詩道同渣甸坊以南、禮頓道以北嘅範圍，係同一座山來㗎～
點解呢座山有咁多個名㗎呢？
咁就要從鵝講起。黃泥涌峽嘅水流，經跑馬地同山谷低地流入海。因為流水又窄又長，好似條鵝頸咁，啲街坊慣晒嗌佢做「#鵝澗」，叫鵝澗以東嘅山頭「鵝頭山」。
開埠之後先有「#東角」，解「維多利亞城以東海角」，鵝頭山多咗個官方名叫「東角山」。
1841 年 6 月，前稱渣甸洋行嘅怡和洋行投得東角三幅地，興築倉棧，怡和大班仲喺東角山起咗自己嘅私人別墅，東角山因而再多個名叫「渣甸山」。
1924 年，利希慎正式從怡和購入鵝頭山／東角山／渣甸山，興建 #利園遊樂場，座山從此又改稱「利園山」。根據《愚公不愚》，利園山嘅移山工程，歷時 31 年，喺 1955 年 9 月終告完成。
同場加映，有鵝頭、鵝頸，咁係咪曾經有 #鵝尾 呢？
又真係有喎。
( ͡° ͜ʖ ͡° ) ✧
相傳利氏喺買鵝頭山前，有相士進言，因為銅鑼灣至灣仔一帶嘅地形似隻展翅欲飛嘅大鵝，買咗鵝首嘅鵝頭山就可以興家旺業。嗱，鵝嘴係怡和貨倉，鵝身係天樂里一帶，鵝尾係喺莊士敦道咁話，似層層㗎！
雖然此鵝非彼鵝，但都鵝喺度ff，銅鑼灣有冇可能出現企鵝山、企鵝道，或者企鵝澗呢？
參考資料
余震宇：《港島海岸線（增訂版）》，香港：中華書局， 2016 年。
鍾寶賢：《商城故事——銅鑼灣百年變遷》，香港：中華書局， 2009 年。
Comentarios