最近圖書館來咗一位新嘅鵝友，同鵝一樣咁鍾意散步，起行前仲會攞部電話出來，話要喺恩平道種花。
(´⊙ω⊙`) #散步種花？咩意思？
「唔係呢個銅鑼灣，係喺另一個銅鑼灣種花呀！」
鵝友show俾鵝睇，佢手機入面嘅另一個銅鑼灣。
鵝友介紹，#Pikmin Bloom係一個手機遊戲，同之前熱爆全港嘅Pokémon GO同屬 #任天堂 出品。個遊戲用好多好得意嘅花花，同埋獨一無二嘅明信片，鼓勵玩家多啲散步。只要連住手機嘅GPS散步，就可以喺遊戲世界裡面種花，所有玩家一齊種嘅花花會編織成一片花海，好可愛，好療癒呀～
即係鵝喺現實世界嘅銅鑼灣散步，都同時喺遊戲入面嘅 #虛擬銅鑼灣 散步？！仲可以種花？！
ヽ(・θ・´)ゞ ✲❀✿❉
意思就即係，只要鵝對腳（鵝掌）行到嘅地方，都可以種花。有人玩即有人行，有人行就種到一片花海。Pikmin遊戲世界嘅銅鑼灣，冇咗啲高樓大廈，但係有一片花海。喺遊戲入面，行行吓又會見到巨大花花嘅「#花花加油站」，等大家可以繼續行多啲路種多啲花。
由2019年開始，遊戲開放俾資深玩家參與投票，利用玩家嘅現實經驗，塑造遊戲裡面嘅世界。呢啲大朵花花，就係由資深玩家投票決定嘅地標，所以同我哋一般認知嘅地標有少少唔同㗎！
睇過睇過，究竟呢個虛擬嘅銅鑼灣花海，同現實中嘅高樓林立嘅銅鑼灣，有咩唔同？
(◍• θ •◍)ゝ
係鵝飛佛嘅 #百德新街 電車站！仲有⋯⋯Michael Jackson？！
多得有玩家嘅參與，比起直接用高樓大廈做地標，遊戲世界裡面嘅地標都係呢啲高樓大廈裡面嘅細節，或者係啲唔行過去都唔知嘅社區角落！
有啲係連鵝呢啲銅鑼灣老街坊，都唔知道嘅窿窿罅罅呢！
除咗可以透過跟住大朵花花來探索社區角落，仲可以藉此回顧以前嘅社區痕跡。例如，花花牆同Michael Jackson壁畫，鵝同鵝友行過去，都發現已經唔見咗啦。
喺一個變得咁快嘅城市裡面，遊戲中嘅銅鑼灣仲係數年前嘅模樣，同埋一片由唔同嘅銅鑼灣人一齊種嘅花海。
係遊戲世界裡面，只要散步就可以攞到呢啲花花嘅種子。行得越多路，就有越多嘅花花種子可以種。講開種花，鵝即刻雙眼發光：「咁喺呢個虛擬銅鑼灣裡面有咩本地花花可以種呀？」
( ˊᵕˋ ; )
鵝友汗顏：「雖然Pikmin Bloom世界裡面嘅花花有好多種，可惜大多係全球性嘅觀賞花種，譬如係銀蓮花、三色堇、香豌豆，而唔係香港原生物種呢。」
噢，鵝不禁有點失望。
鵝幻想，如果任天堂可以因地制宜就好喇，等鵝有得種香港原生嘅花花草草——種車前草、油甘子、桃金娘、草豆蔻⋯⋯嘩，一定仲好玩！！！
Comments