鵝坐到悶悶哋落樓散步，一路向西行，抬頭一望，原來已經行到鵝頸橋街市，時間尚早，就入去逛下～入面有各式各樣嘅檔攤，賣水果、鮮肉檔、生活雜貨，店主都趁下午茶時間，喺舖頭前面圍埋傾計，講吓生活日常。
(。･o･｡)ﾉ
再上二樓，見到樓梯轉角有「新華鞋」、「專業車窗簾」等手寫招牌，仔細睇字型都非常相近，正當鵝好奇嘅時候，有街坊靜靜雞講，原來係邀請咗街市擺檔嘅中醫 #袁榕根 即席揮毫，義務寫招牌！
作風低調嘅袁醫師坐喺舖頭一個小角落，啱啱完成為街坊問診嘅工作。袁醫師請鵝坐低，斟杯茶慢慢傾～
袁醫師同太太分別經營紙紮舖同中醫店，最初喺街市擺檔時，為太太嘅舖頭寫上一米長嘅「法運寶燭」招牌。有街坊見佢寫得一手好字，就請佢得閒義務寫招牌。十幾年過去，招牌雖然因為歲月流逝，喺日光照射下而褪色，但袁醫師寫上嘅「專業車窗簾」仍然清晰可見。
佢諗返起，話多得袁爸爸嘅督促。在40年代嘅時代背景下，佢從小都被要求要多習字，爸爸話：「你不學好一手字，將來搵食難一點」。如是者，佢每星期寫兩篇書法，無師自通亦揮灑自如。袁醫師更加話，有朋友知道佢鐘意寫書法，送咗枝巨型羊毫碗筆畀佢得閒習字。
傾傾下，袁醫師遞上碗筆，請鵝試試⋯⋯
鵝拎起⋯⋯嘩，重量喺平時毛筆嘅幾倍喎！鵝一筆一筆努力咁寫，唔～睇嚟都要繼續努力先去到佢嘅水平！
....φ(・∀・*)
話返轉頭，袁醫師話，幾十年後講返呢個故事，隨住時代變遷，依家都唔需要「寫得一手好字」啦，點解？因為大家有咩都用電腦打字，用筆寫字嘅人買少見少，更何況毛筆書法呢～
袁醫師講得輕鬆，計鵝話～無論用咩方式，最重要喺搵到書寫嘅意義，繼續喜歡文字。
鵝都係返屋企，多練習，再搵機會同醫師切磋！
ヾ(・ω・)メ(・ω・)ノ
Comments