上星期提過，鵝諗住去維園探小葵，先會誤打誤撞聽到蟬叫。今日一於介紹小葵啦！
小葵全名 #小葵花鳳頭鸚鵡，佢全身羽毛白雪雪、眼大大，頭頂有幾根黃色微捲「呆毛」冠羽，展開時似向日葵花瓣。
同為銅鑼灣街坊，鵝鍾意親切地稱呼佢哋做小葵。
諗返起上年 11 、12 月七點零鐘，鵝見過成 30 幾隻小葵聚喺幾棵近噴水池入口嘅樹頂，唔知傾啲咩，嘈到拆天。
忽然間，佢哋好有默契咁，成群往食街方向飛，飛去第二棵離鵝遠啲嘅樹⋯⋯好似知道鵝離遠觀察緊佢哋咁。佢哋眼咁大，唔知係咪真係眼力好啲？
鵝唔曉飛，唯有用鵝腳追去棵新樹，點知佢哋又再集體飛去網球場附近！
ε=ε= (っ° Д ° ;)っ
佢哋一邊飛，仲一邊洋洋得意咁「啞呀——啞呀——」，鵝唔忿氣，誓要追到雀！！！
ತ～ತ
自此，鵝不時去探小葵。鵝追小葵躲，有時成功，有時徒勞無功。
鵝又發現，佢哋停靠嘅樹下經常滿地幼枝葉。查網上資料才知道，屬於鳳頭鸚鵡科嘅小葵鐘意啃咬樹枝。
哦！鵝明呀，鵝都鍾意啃咬魚肉燒賣同炸池魚呢～
不過五月開始，就少見佢哋蹤影，可能過咗香港公園玩都唔奇。鵝好掛住佢哋呀，日頭夜晚都去維園望吓小葵返來未。
‹‹\( ˙▿˙)/›› ‹‹\( ˙▿˙ )/››
唔通小葵返咗來？！
突然鵝頭頂傳來粗糙沙啞、好似機器生鏽嘅熟悉鳥鳴：
「啞呀———」
鵝張望四周，跌跌跑跑追咗半個公園，仍然見唔到小葵一眼。
嗚，小葵仍然係捉依因嘅高手高手高高手！
(* ´ Θ ` )
鵝鍾意小葵，因為佢哋身世傳奇。
小葵原生地喺印尼、東帝汶，十九世紀開始被捉來做寵物貿易，加上原生地樹林砍伐情況嚴重，生存空間縮小。現時喺《國際自然保護聯盟瀕危物種紅色名錄》被評為「極危」，全球野生種數量估計唔夠 2,500 隻。
第一批出現喺香港嘅小葵，據聞喺交易過程中逃脫。另一說法，以前喺港督楊慕琦官邸嘅鳥舍養咗 23 隻小葵，直到香港淪陷前，小葵就被放走。
現時港島市區，例如香港公園、薄扶林和跑馬地一帶都有小葵嘅穩定群落，總共約 150 至 200 隻，佔全球數量一成。香港成為佢哋安居繁衍嘅地方。研究小葵嘅生態學家Astrid Andersson發現，相比起原生地印尼科莫多島嘅小葵，香港小葵更加唔怕接近人同車，十分適應城市環境。
鵝都係好適應銅鑼灣嘅雀喎，不過企鵝就冇 200 隻咁多喇⋯⋯見到小葵一群群咁熱鬧，鵝都有啲羨慕。
小葵啊，快啲再現身啦～
（許願）(ㅅ˘ㅂ˘)
Comentarios