個設計睇落幾型㗎！兩塊板呈弧形，曲線相交向上彎，好似瀡滑梯咁。原來係上世紀二三十年代興起嘅國際風格嘅設計，係 #現代主義建築 嘅一種。個池建於 1934 年，由建築師 Berthold Lubetkin 設計，再由起悉尼歌劇院嘅工程師 Ove Arup 負責興建。呢個企鵝池之所以咁受人類喜愛，係因為鋼筋混凝土（即係石屎）好難整得咁輕盈優美㗎。
講到咁犀利，唔通佢內外兼備，係起畀企鵝嘅水上樂園，可以瀡滑梯？
唔係啵，鵝睇返紀錄片，啲企鵝喺上面行㗎喎。但其實長期喺石屎上行走，會增加企鵝患上趾瘤症（bumblefoot infection）嘅風險。趾瘤症會令企鵝嘅腳掌發炎潰瘍，又紅又腫，嚴重嘅話，仲可能會跛，好可怕！
o(; >△<)o
鵝以為動物園嘅建築，最緊要係令動物住得舒服，最好接近原本嘅生境？唔係為咗俾人類騷 quali 麻。雖然 1980 年代負責修復泳池嘅員工 John Allan 為設計辯護，話本身池邊係鋪橡膠，冇咁傷企鵝，但嗰次修葺，為咗避免管理員跣親，增加地面摩擦力，園方就要求加石英粒，令好多企鵝腳仔受傷。
到咗 2004 年，動物園終於將企鵝安置去其他園區，而哩個企鵝池就至此荒廢。但鑒於企鵝池喺建築史嘅地位，又係英國特殊建築和歷史遺產法定列表中嘅一級登錄建築，所以至今園方都冇拆個池。但鵝就諗，唔適合居住嘅屋企，又算唔算偉大嘅建築呢？
(._.)
コメント