「嘰———嘰—————」
(⚆ ᗝ ⚆)
鵝冇咁傻瓜，都知道唔係苦楝唱歌，而係蟬鳴。唔知係咪幻聽，鵝覺得佢哋係嗌：「好熱⋯好熱⋯⋯」事關鵝都覺今個夏天好熱好熱。
鵝想搵吓啲蟬喺邊，不過黑麻麻，佢哋又善用保護色融入樹幹同樹枝，視力再好都睇唔清呀。
過兩日，鵝就帶埋望遠鏡去睇，仲拎咗新腳架諗住影輯靚相。點知佢哋實在匿得太好，鵝日光日白都係搵唔到佢哋真身。
鵝唔信邪，又過多兩日再去多次，今次連蟬聲都冇埋！
嗚，遲咗一步⋯⋯
(* ´ Θ ` )
翻查資料，雄蟬腹部兩側有一對肌肉，分別連接住身體兩側嘅鼓膜。當嗰對腹部肌肉收縮，就令鼓膜振動。不同於其他昆蟲，蟬嘅腹腔中空，就似結他音箱將聲音擴大，傳到好遠好遠。雌蟬就係冇鼓膜嘅，唔識鳴叫。
蟬嘅壽命只有60至70日。交配後雄蟬就死亡，而雌蟬產卵後都會死亡。視乎物種，幼蟲會在泥土裡成長一年至十幾年不等。成蟲期先爬到樹上羽化，成為我哋平時見到有四翅嘅模樣。
ϵ ( 'Θ' ) ϶
香港常見會鳴叫嘅蟬有 #黃點斑蟬、#草蟬、#蚱蟬、#紅鼻蟬，繁殖高峰期喺五月至八月。佢哋都以吸啜樹葉、枝幹嘅汁液維生。可能嗰棵苦楝樹汁特別香甜，又或者樹嘅位置優越，雄蟬們都聚集合唱，吸引更多雌蟬到來。
♪( ´θ｀) ♪( ´θ｀)
下個夏天，鵝要多多留意呢棵苦楝喇！
參考資料
香港科學館。2020〈動物界大聲公（二）：蟬〉
Comments