突然，眼角有一個小小、啡啡哋嘅影子飛過，飛咗上眼前嘅大花紫薇。
會唔會係 #蝙蝠 呢？
\ (´◕ ᗝ ◕｀) ✰/
一直都知銅鑼灣有蝙蝠出沒，但通常都係喺啲好黑嘅地方，見佢哋zigzag形咁急速飛過。走到樹底，確實見到樹上掛咗個褐色身影，佢似乎喺度休息。
不過，附近亦有唔少枯葉，顏色相近，僅憑鵝 1x 嘅肉眼，難以分辨。確認位置後，立馬拎出電話，打開相機，對焦，再放大⋯⋯
果然冇睇錯！真係蝙蝠！鵝終於影到銅鑼灣蝙蝠嘅玉照。
蝙蝠唞嗰陣，係用腳趾鉤住支撐物，倒掛住自己，放鬆成隻蝠，其實係好慳力㗎！用咁嘅姿勢入睡，係為咗喺蛇、鷹等天敵來襲嘅時候，隨時一鬆爪就飛得。
吖，蝙蝠又係哺乳類，人類助手又係哺乳類。點解助手踎低起身都見頭暈，咁點解蝙蝠成日倒吊，都唔會頭暈㗎呢？
原來因為佢哋夠輕：世上已知最大嘅兩種蝙蝠，澳洲黑狐蝠同菲律賓金冠飛狐，都只係重約 1.1 公斤咋！重力唔足以影響佢哋嘅血液循環。
嗱，鵝冇話人類助手重，係蝙蝠太輕咋～～
用電話觀察咗一陣，低解像度嘅畫面都係滿足唔到鵝。見蝙蝠都唔太會郁，鵝發揮游水嘅速度，嗱嗱臨衝上屋企拎望遠鏡，返到原地——
太好喇，佢仲喺度呀！！周圍人來人往，舉起望遠鏡𥄫住棵樹，好似有啲奇異。但鵝唔理得咁多喇，睇蝙蝠要緊。
睇睇吓，有位本來影人跳舞嘅攝影師搭訕：
「棵樹有咩好睇呀？」
「係蝙蝠呀，嗰度有隻蝙蝠！」
「邊度呀⋯係喎！你咁都見到嘅！？」
同蝙蝠仔萍水相逢嘅攝影師，見鵝影得咁高興，佢都唔執輸影咗輪。鵝好努力咁隔住個望遠鏡，用電話影相，希望之後用來請教朋友。香港蝙蝠共 25 種，會喺市區出沒嘅就有 #短吻果蝠、#東亞家蝠、#扁顱蝠 等等，苦惱嘅係，鵝對住圖鑑都唔曉分呢。
請問有冇高手可以教鵝認蝙蝠呀？
Comments