11月12日

大葉桉都着披風

鵝嘅 #MUJI 展已經圓滿結束，好多謝咁多位鵝友、街坊來參觀啊～～你哋留言嘅銅鑼灣故事，仲有畫鵝嘅作品，鵝都有keep起珍藏㗎！！！

ฅ (๑*д*๑) ฅ

秋風起，繼續 #眈天望地。早幾日，鵝友買咗枝微距鏡頭，夾鵝去 #維園 睇生態。佢話，#微距攝影 可以特寫一啲好細嘅事物，放到勁大勁大，咁就觀察到動植物更多細節啦！

行行下，鵝俾一棵樹幹生滿青黃色 #苔蘚 嘅 #大葉桉 吸引住。平時見到青苔，都係䁽吓眼就算。既然有機會可以微觀，不如就影返輯苔蘚相啦！

鵝友一邊set機，一邊同鵝解釋，微距攝影有幾難。咩咩柔光罩、對焦、光圈，好複雜喎。鵝無心裝載，遊魂之際望望周邊嘅樹⋯⋯

「點解淨係大葉桉上面嘅苔蘚特別茂盛㗎呢？」

(⊙ ө ⊙)？

鵝友話，微距攝影要後製完先睇得清楚，鵝就趁機查資料。

大葉桉係來自澳洲嘅外來種。呢種樹嘅樹皮，唔會因為樹幹變粗而剝落，反而隨時間堆積成厚實嘅木栓層。木栓層裏面保存住好多水份，好似着咗件防火披風咁，就算遇到火燭，都淨係傷到「面皮」，保護到再入面啲嘅木栓形成層。

啊！鵝有理由懷疑：啲苔蘚就係因為有呢個含水嘅木栓層，夠晒濕，所以先會生得咁開心？

相關文章