大坑舞火龍

#中秋 迎月夜，一入黑，鵝察覺到天后一帶零舍熱鬧，唔少人都向大坑方向行。

「咚！咚！咚！」已經聽到鑼鼓聲喇，咁快開始㗎咩？

心急鵝加快腳步，沿銅鑼灣道轉入書館街，見到成大桶嘅「龍茶」普洱，仲聞到炭燒乳豬添！雖然鵝唔食，但見到圍住炭爐嘅人類都食唔停手⋯⋯

大家有睇當晚鵝拍嘅reels，都知鵝去咗睇 #大坑舞火龍 啦！鵝生得唔高，好難先喺 #浣紗街 搵到個冷氣機滴水嘅位企，趷高再趷高腳先睇到火龍咋。

一條火龍原來好重㗎，全長 67 米嘅火龍由 300 位舞龍健兒引領，淨係個龍頭就已經係 47 公斤重！

鵝心諗，咁咪好似差唔多要舉起成隻人類助手咁囉⋯⋯

\ (⊙ȏ⊙) /

而且條火龍唔係淨係游嚟游去咁簡單，仲有好多陣式㗎。最犀利嘅就係「 #起結龍團 」（又名「打龍餅」）同埋「 #火龍過龍尾 」。

打龍餅，打得越細越考功夫，而且啲煙會集中晒係中間，好辛苦㗎！到最後，龍頭會喺龍尾下面穿返出嚟，一瞬間線香互相碰撞，火光四射，好似星星咁，好靚。

舞完火龍之後，佢哋會派啲燒完嘅線香俾觀眾，象徵祝福同好運。鵝都收到一支呀～

((((((((((っ･ Θ ･)っ

今年更新添咗一條LED小火龍，俾「大坑火龍少年團」嘅小朋友舞龍，旨在培養下一代對舞火龍嘅興趣，繼續傳承呢個傳統，年年有龍舞。

有大火龍，又有小火龍，唔知有冇小小火龍可以俾鵝試下呢。

₍₍ ᕕ( •̀ㅂ•́)ᕗ⁾⁾

#企鵝散步見聞

#企鵝過節