咁現實中銅鑼灣嘅花花，又係點㗎呢？
自 2004 年起，土木工程拓展署（CEDD）制訂同推行市區綠化總綱圖，規劃每區要種啲咩花草樹木。上環、灣仔同銅鑼灣圍繞「#彩虹」做主題，將唔同地段劃分成紅、橙、黃、綠、藍、紫色，再種相應嘅花草樹木。
聽落好繽紛咁啊～
Σ ₍• ө •；₎ “
咁點解訂咗主題做彩虹呢？根據CEDD嘅講法，港島北面一帶嘅路，係沿住維多利亞港，往東西兩邊、向海伸延同發展嘅，就好似一層層嘅彩虹咁。
睇返銅鑼灣，#紅隧 海傍起係紅色區，跟住橙、黃、綠、藍、紫區依次出現，#跑馬地、#渣甸山 同 #掃桿埔 一帶係藍紫相間嘅。喺Pikmin Bloom裡面嘅銅鑼灣散步，花花任種；但現實嘅銅鑼灣，設計園境時就要配合地理。
唔同顏色嘅區，喺規劃中，大致上都係種返相應花色嘅樹木㗎！好簡單，被劃為紅色區嘅避風塘，就種多啲大紅花；位於橙色區嘅時代廣場就種橙紅龍船花，如此類推。
企鵝嘅屋企 #打書釘，位於黃色區，附近種咗金蒲桃、金英花，同硬枝黃蟬等，都係開黃花嘅草木。鵝都覺得佢哋啲花同鵝嘴超襯～
✲❀ヽ(・θ・´)ゞ ✿❉
喺 2008 年 8 月至 2009 年 12 月期間，上環、灣仔同銅鑼灣呢三個區，總共種咗成 2230 棵喬木，52 萬棵灌木咁多！然而，睇返 2008 年嘅立法會文件，原來有唔少建議種嘅樹冇種到，例如本身有五棵會種喺白沙道，又有兩棵想種喺燈籠洲街市旁邊嘅渣甸街路口，最終都未能實行。有機會係因為地下有公共基建，或者行人路太窄而告吹，讓佢哋同鵝有緣無份⋯⋯
雖然銅鑼灣有排未變得成鵝心中嘅大花園，但「彩虹」都係個奇妙嘅視角，令鵝留意多啲街上嘅植物，又想數吓今日見到幾多隻色喇！
Comments