【三島由紀夫到訪過萬金油花園】
原來日本文豪 #三島由紀夫 踏足過銅鑼灣！
三島由紀夫嘅文筆優美又古怪，對人性同美學亦有獨到又引人深省嘅見解，係必讀嘅日本作家之一。二戰後，三島由紀夫積極搵唔同嘅出國機會，喺1951年至1961年，去咗三場環遊世界嘅旅行，而香港係其中一站。
1961年，三島由紀夫到訪香港，分別就萬金油花園、九龍城寨同埋避風塘寫咗三篇遊記。鵝很疑惑，香港咁多景點，點解三島由紀夫偏偏揀咗呢三個地方呢？
(⊙ д ⊙) ？！
【旅行是為了「邂逅這世上最醜的東西」】
鵝未搵到確切原因，不過公認係靚嘅景點，佢就唔慌去嘅。
根據三島由紀夫嘅遊記《美的反面》，佢喺環遊世界嘅旅途中，慢慢對美景感到厭倦，盼望「邂逅這世上最醜的東西」，搵到「甚至連『醜陋之美』也稱不上的徹底顛覆美學感受的東西」。然而，無論喺墨西哥睇馬雅文化金字塔，喺海地睇巫毒教儀式，定喺美國睇摩天大樓，佢都淨係感受到美。
換句話講，真係悶死佢呀。
多番失望嘅三島由紀夫，終於喺香港夢想成真。佢形容：
「香港。在這個著實異樣、令人戰慄的城市裏，我覺得自己終於見到了尋找已久的東西。」
登登！佢搵到嘅，就係依家已被拆卸嘅萬金油花園啦！
三島由紀夫話自己「這一生從未看過這樣的東西」、「幾乎無法形容那些五顏六色有多麼醜陋」，對佢而言非常衝擊。佢對萬金油花園嘅印象係「令人作嘔」同埋「每一個角落都遍佈了這種令人毛骨悚然的性感」。佢甚至懷疑，萬金油花園裏面裸體女子嘅雕塑，其實係胡文虎用水泥活埋佢哋製成。
嗚嗚，鵝讀到呢度，馬上諗起差唔多廿年前嘅電影《恐怖蠟像館》（House of Wax）嘅情節呀⋯⋯
ヾ(´･ ･｀｡)ノ
【「作嘔」都可以係讚美？】
三島由紀夫做咩無啦啦話萬金油花園令人作嘔先？
就算萬金油花園一幅幅描繪地獄嘅壁畫、豬身人偶、詭異地大笑嘅和尚雕塑，全部都好得鵝驚，未至於係「徹底玷污一切美麗之物的園林」吓嘛～
正當鵝諗住同呢位大文豪跨時空隻抽，一位愛讀日本文學嘅鵝友制止鵝。
「其實三島由紀夫係讚緊萬金油花園呀！」
鵝：咩話！？？？
( ˘･з･)？
三島由紀夫窮盡一生追求極致美學，對「美」同「不美」嘅定義有獨到見解。
鵝翻查論文，有大量學者都研究過三島由紀夫美學，大家莫衷一是，講成年都講唔完呀。最簡略嘅理解就係三島由紀夫對「美」十分之執著，會透過「醜陋」去探討乜嘢叫做「美」。
時任大坂大谷大學人間社會學部教授林進論《金閣寺》，講到三島由紀夫眼中嘅美係要令人感到「適得其所」，同時要引人妒忌同怨憤，會令人直視自己嘅無能，繼而激起想將其毀滅嘅慾望。
咁乜嘢叫醜呢？睇返《美的反面》，三島由紀夫好執著喺一個「樣樣皆美」嘅世界中，尋找美嘅反面——「史上所有墮落型態的混合物」，一種「永遠背離我們的美學觀點［…］巧妙地避開美學感受，自始至終維持醜陋的新鮮度」嘅東西。
三島由紀夫指，萬金油花園嘅宣傳標榜典型東方美，無疑有追求「美」嘅企圖。但係佢鮮艷嘅用色同埋古怪嘅水泥雕塑，「連每一個細節都巧妙地違反了美學」，處處「充斥著對美學的絕妙惡意」，亦係一個「不合邏輯」又「無法到達理性」嘅空間。
係呀！萬金油花園令佢作嘔，不過咁都可能正正係佢追求嘅體驗，話唔埋係個表揚添！
或者，三島由紀夫就係喺香港，呢個佢眼中黑暗、神秘又危險嘅城市裡面，發掘咗「美嘅反面」，對美學有新見解。篇文嘅結尾同樣耐人尋味：
「野獸的咆哮、人類的呻吟、全都固化成水泥的形態，大搖大擺地隱身在現實之中，以致於絕對不可能超越現實。再加上這一片可怕的混沌根本是失敗的，可以說，連混沌之美都刻意避開了。［…］雖然這些形體都是從歷史和傳說之中擷取出來的，卻絲毫感受不到歷史的氣息，只有剛上過的油漆泛著簇新的光澤。於是，人們在這夢魘般的現實裡所看到的每一張瞼，甚至統統稱不上是人臉。」
呢個「醜到令佢作嘔」嘅萬金油花園已被拆卸多年，如果三島由紀夫可以遊覽依家嘅虎豹別墅，佢又會有咩感受呢？
參考資料：
（日）三島由紀夫著，吳季倫譯：《小說家的旅行：三島由紀夫的旅行情事》，（臺灣：馬可孛羅，2016年）。
林進. (2009). 三島由紀夫 『金閣寺』 論--力への意志あるいはルサンチマンの美学（三島由紀夫《金閣寺》論—— 嚮往力量的意志及無名怨憤的美學）. 大阪大谷大学紀要, 43, 35-63.
Comments