鵝鍾意睇書，一直對英國出版社 Penguin Books 相當有好感，皆因大家都係企鵝。有一日，鵝友拎咗韓國出版嘅 Magazine B 第 10 期比鵝睇。呢本以英文書寫嘅雜誌，每期都專門介紹一個世界知名嘅品牌，而第 10 期就係關於 Penguin Books～
話說喺 1930 年代，有位英國人 Allen Lane 覺得買書太貴，好書以硬皮嘅精裝書為主，有錢人至買得起。普羅大眾只負擔得起 dime novels，即內容庸俗、印刷 & 釘裝都好粗糙嘅流行讀物，有啲小說，有啲八卦嘢咁。
Lane 認為，書係用來睇，唔係用來儲或擺，應該人人都負擔得起，於是喺 1935年成立 Penguin Books，專門出版高質、平價，而且方便攜帶嘅軟皮平裝書。佢好努力洽購好書版權，務求將內容精緻嘅作品普及，越多人睇越好。
除咗小說同文學外，Penguin 亦出版政治觀察，其中出名嘅有 1939 年出版嘅 What Hitler Wants，係德國學者 Leon Trotsky 對希特拉著作《我的奮鬥》嘅深度批判，呢本書當時好多軍人睇，Penguin 仲為離家作戰嘅軍人開讀書會添呀。
咁點解用企鵝做 logo？
當時啲書通常書名、作者名最當眼，但 Lane 期望讀者會認住出版社來買書，所以改個易認嘅名好重要！據講開會傾公司名時，列咗張好長好長嘅名單，Lane 都未滿意，直到會議室一角有把聲嗌出：「叫『企鵝』點睇？」，獲得與會者一致通過，皆因企鵝睇來有尊嚴得來，又帶幾分輕浮，襯晒出版社形象。
於是 Lane 就叫新入職嘅設計師 Edward Young 去倫敦動物園觀察嗰度嘅企鵝，設計成出版社嘜頭。多年來，企鵝嘜頭經歷多次修訂，由始至今都係黑白雙色。
鵝好奇 Penguin Books 嘜頭係參考乜嘢物種嘅企鵝，但無論係 Magazine B，抑或 Penguin Books 網站，都無提及ಠ‿ಠ黑白雙色，咁即係可以排除皇帝企鵝、國王企鵝，同埋一堆有黃色長毛嘅型型子啦。下巴有條帶，唔通係帽帶企鵝？都有可能係南美企鵝喎⋯⋯
Comments