星期四暴雨成災，雨量破歷史紀錄，令鵝好具體地感受到，#全球暖化 真係非常嚴重，值得大家正視。
鵝喺非洲嘅遠親近來亦傳來令鵝憂心嘅消息，都同全球暖化有關。國際保育組織 Two Oceans Aquarium Foundation 早前表示，野生嘅 #非洲企鵝 ，最快可能喺2035年滅絕。
其實喺2019年嘅今日（9月9日），非洲企鵝已被《國際自然保護聯盟瀕危物種紅色名錄》列入 #瀕危物種 ，呼籲公眾關注非洲企鵝嘅瀕危情況。
可能有人會諗，我哋做得啲乜吖，物種滅絕、氣候變化呢啲咁巨型嘅big issue，個人力量有限，關注又點啫，做唔做都分別唔大⋯⋯
唔係㗎，老土講句（ #真理通常都係老土嘅），人人/鵝鵝做少少，聚沙成塔，總有改變，即使只係微小嘅改變，都好過冇。減少碳排放，制止全球暖化，大家真係有好多嘢可以做。
自備購物袋、食物盒、外賣杯呢啲基本啦，無法完全唔開冷氣嘅話，至少開冷氣時，咪較到凍到要著外套，或者同時開風扇減低用電量，其實都好易做到吖。
講多少少遠親資料。
非洲企鵝又名 #斑嘴環企鵝 、 #南非企鵝，喺分佈嘅非洲南部嘅特有種，亦係唯一一種生活喺非洲嘅企鵝。喺企鵝界來講，非洲企鵝算係中等身裁，大約60至70厘米高 （現存物種中最高大嘅係皇帝企鵝，約110至120厘米高；最嬌小係小藍企鵝，約30厘米高）。
黑口黑面黑腳，非洲企鵝心口有條打橫嘅黑色班紋，但白色羽毛覆蓋比例較其他企鵝多，成個肚皮都係白色，再兜一啲上jaw line，睇落比其他企鵝更明顯有頸！
非洲企鵝對眼上方有撻粉紅色，似搽咗eye shadow。其實嗰撻粉紅色係冇毛嘅裸露皮膚位，用來散熱，越熱就越粉紅。
鵝唔想以後只有喺動物園至見到遠親。希望大家 #睇在可愛嘅份上，盡量環保啲，保住非洲企鵝，咪絕種。
Comments