top of page
2023年9月24日

造幣廠

上星期企鵝過咗對面海，到大角嘴嘅匯豐中心歷史檔案部參觀，真係大開眼界。


當中頗令鵝念念不忘嘅，係一批香港鑄造嘅硬幣，所以返到屋企又繼續搵書睇～


話說英治初期嘅香港，市面流通貨幣非常複雜，有中國銀元、墨西哥鷹洋、西班形本洋、印度盧比等等，至1845年，政府頒佈公告，容許上述貨幣流通嘅同時，確立英鎊為法定貨幣；1864年，香港至首次有喺英國鑄造嘅港元硬幣流通市面。


同年，香港立法局通過《香港造幣廠法案》，喺 #東角 嘅新填地上成立一間銀幣鑄幣廠——即位於家陣嘅 #京士頓街 、 #加寧街 & #告士打道 交界， 生活雜貨店ものもの嗰度。


#香港造幣廠 喺1866年5月7日開幕，鑄造四種香港銀元：壹元、半元、一毫 & 五仙 （即係 #斗零）；亦有說香港造幣廠鑄造六種面額嘅港幣，除咗上述四款，仲有二毫 & 一文。


不過，鑄幣廠營運咗兩年，到 1868年 5年就停產，因為蝕得太甘。據講，造幣廠開業初期，曾貼告示表示「如有舊銀元、銀錠、銀屑，均可收受代熔代鑄新幣」。即係大家可以拎啲中國銀元、墨西哥鷹洋、西班形本洋、印度盧比去香港造幣廠熔晒佢，換啲港銀返來，但當時嘅人唔多願意咁做，所以鑄幣廠做唔住，開業兩年就執笠。


根據紀錄，造幣廠喺停產前，鑄造咗2,108,054枚銀幣。（好精確嘅記錄！）


廠房倒閉，廠址賣咗俾 #怡和洋行 ，鑄幣機就賣咗去日本，部古董機家陣喺 #大阪造幣局 ，仲展覽緊㗎～


Comments

bottom of page