聽聞 IKEA 有北歐冷衫 #聖誕樹 ，好似好型咁，於是鵝就孖鵝友一齊去睇樹。
٩(ˊᗜˋ*)و
正如平日買隻湯羹都要行兩層，今次搵樹，鵝都係行足兩層，去到自助倉至見到。北歐冷杉好靚，目測成兩米高（高過鵝友 who is a 華裔中等身材人類雄性），掛埋裝飾，放埋禮物盒，成朕聖誕味出晒嚟～
可惜職員話冷杉經已售罄，「人造聖誕樹就仲有現貨，你可以睇睇。」
聽到人造樹，冷知識達人鵝友即刻話：「人造樹通常用 PVC 膠片造，睇落好假，又容易甩到一地都係。而且，香港冇回收商收 PVC 㗎。」
行近啲睇，IKEA 嘅膠樹都幾似真樹，未必用 PVC 膠片？睇埋標籤，上面寫住一串串鵝睇唔明嘅化學名詞，聚乙烯、聚丙烯⋯⋯見鵝一面疑惑，鵝友就解釋：「原來呢棵唔係 PVC 樹啵，係用 PE 注塑而成，仿真度較高，成本亦比 PVC 高。」
聽到鵝一嚿雲。
「PE 即係標籤上嘅 #聚乙烯 ，市面上多數洗頭水樽都係用呢類膠，呢棵樹嘅針葉就係用 PE 造。包住樹幹嘅膠帶係 #聚丙烯 ，又稱 PP，同外賣飯盒嗰啲半透明膠係同一類。」鵝友繼續解釋，「理論上，只要有心機拆開哂佢，葉還葉、膠帶還膠帶、金屬還金屬，呢棵人造樹成棵都可以分類回收，好過 PVC 少少。」
諗真啲，鵝並唔係必須擁有一棵聖誕樹，無論係北歐冷杉，定人造膠膠樹。鵝只係想親近大樹。
鵝知道自己應該去邊。
Comments