奧運橋

#奧運 舉行得如火如荼，大家有冇晚晚睇到半夜三更呀？鵝都追住港隊比賽嚟睇，睇 #張家朗 嘅 #男子花劍決賽 睇到五點先瞓！

ヽ(≧ ө ≦)ノ

身為銅鑼灣第一游泳高手，鵝都好想去巴黎一展身手。無奈奧運只准人類參加，又得 #蝶式、 #蛙式 比賽，居然冇 #企鵝式 ⋯⋯

冇得參加奧運，惟有近近地去「 #奧運橋 」行吓啦！

奧運橋鄰近 #聖保祿學校，橫跨 #禮頓道 同 #伊榮街，係香港首條橫跨馬路嘅行人天橋，1963年6月18日正式啟用。佢最初只係一條普通嘅天橋，為紓緩當時號稱銅鑼灣「人車最擠擁之處」嘅 #樂聲迴旋處 交通擠塞而起，冇奧運主題嘅裝飾㗎。

後來喺2002年，由灣仔民政事務處委託路政處美化天橋，當時聖保祿學校 嘅同學就提出咗「奧運橋」呢個設計，慶祝當年中國成功申辦奧運。

奧運橋共有五條樓梯，每條樓梯嘅每層梯級都順序印有舉辦奧運嘅年份同埋主辦城市。細心啲睇，會發現有兩屆取消咗嘅奧運印埋喺同一級喎！

解解畫，話說奧運橋曾經喺2016年翻新過，將1940同1944年印埋喺同一級，咁就有位印埋2012倫敦奧運同埋2016里約熱內盧奧運啦～

咦，咁之後嘅東京奧運，仲有今屆 #巴黎奧運 呢？唔通要印埋上橋面？

ˎ ?₍ • ө •₎? ˏ

#企鵝散步見聞