呢幾日收到好多鵝友傳來呢單新聞，同時關心鵝嘅睡眠品質～
其實鵝喺 #銅鑼灣 生活咗咁耐，已經變成 HK style 嘅瞓覺模式，大概係「夜晚唔願瞓，朝早又唔願起身」咁⋯⋯
又話說，Now 新聞呢個報導係引述The Guardian，而The Guardian 其實係引述科學期刊 #Science ，咁鵝梗係去番睇睇 Science 點講啦。
首先，大家可能被中文報導中 #南極企鵝 呢個稱呼影響，以為泛指住喺南極嗰附近嘅所有企鵝，其實唔是的。呢個研究只聚焦 Chinstrap Penguin，「南極企鵝」只係其中一個譯名，而由於兩頰至下顎有條斑紋，睇落好似戴咗帽縛實條帶以防甩帽咁，所以又稱為 #帽帶企鵝 。
順帶一提，其實有八個物種嘅企鵝，都係住喺南極嗰頭，除咗帽帶企鵝，仲有：
❆ 皇帝企鵝 Emperor penguin
❆ 阿德利企鵝 Adélie penguin （鵝估Sanrio 嘅XO 都係呢種，大家睇睇眼神就明）
❆ 巴布亞企鵝Gentoo penguin
❆ 冠企鵝，又稱長眉企鵝 Macaroni penguin（貌似剛剛染完髮仲整埋highlight嘅90年代潮童）
❆ 跳岩企鵝 Rockhopper penguin（比冠企鵝更霸氣）
至於大家熟悉嘅國王企鵝 King Penguin ，查實並唔係住喺南極洲，同麥哲倫企鵝 Magellanic penguin 都係住喺 #副南極地區 (subantarctic) ，即南極地區以北少少嘅範圍，約略南緯 46° 至 60°。
睇番 Science 篇文，研究人員稱帽帶企鵝呢種每次恰幾秒、每日恰成萬次嘅瞓覺模式為 #微睡覺 （microsleep），除咗有利於孵蛋或照顧企鵝BB，慎防一家大細成為捕食者嘅獵物，亦同佢哋聚居之處又嘈又迫有關。
有幾嘈呢？嘈到主理呢項研究嘅科學家都話嘈到瞓唔到。
但又咁，會唔會係企鵝冇人類咁怕嘈呀？可能企鵝聽力弱過人類呢？
鵝又岔開查查，根據美國 SeaWorld Parks 資料，企鵝聽力唔錯㗎，指曾有一項研究發現，非洲企鵝可聽到100至15,000 赫茲嘅聲波頻率。至於人類，根據維基百科，大約 20至20,000赫茲。
即係話企鵝都聽到噪音嘅，怕唔怕嘈呢，鵝估就因鵝而異啦。
#企鵝學 講住咁多先，臨尾講多個無聊彩蛋俾大家知。鵝友傳來呢單報導時，問鵝瞓覺時係企喺度瞓，定係瞓喺度瞓？
但鵝友唔罷休，繼續問奇怪問題：「咁你個屁股掂唔掂地先？唔掂地先叫踎，掂地嘅話，係坐。」
咁其實係掂地嘅⋯⋯
「咁你係坐喺度瞓，唔係企或踎囉！」
人類嘅語言真係複雜。
Comentarios